Alþingi sett á morgun

Alþingi verður sett að nýju á morgun með hefðbundnum hætti og fjárlagafrumvarp fyrir árið 2011 verður síðan lagt fram klukkan 16. Jóhanna Sigurðardóttir, forsætisráðherra, mun síðan flytja stefnuræðu sína á mánudagskvöld og síðan verða umræður um hana.

Þingsetningarathöfnin hefst kl. 13.30 með guðsþjónustu í Dómkirkjunni. Forseti Íslands, biskupinn yfir Íslandi, forseti Alþingis, ráðherrar og alþingismenn ganga fylktu liði til kirkjunnar úr Alþingishúsinu kl. 13.25.

Sr. Halldóra J. Þorvarðardóttir, prófastur Suðurprófastsdæmis, predikar og séra Hjálmar Jónsson, sóknarprestur í Dómkirkjunni, þjónar fyrir altari ásamt biskupi Íslands, herra Karli Sigurbjörnssyni. Organisti Dómkirkjunnar, Kári Þormar, leikur á orgel og kammerkór Dómkirkjunnar syngur við athöfnina.

Að guðsþjónustu lokinni ganga forseti Íslands, biskupinn yfir Íslandi, forseti Alþingis, ráðherrar, alþingismenn og aðrir gestir til þinghússins.

Forseti Íslands setur Alþingi,  og að því loknu flytur forseti Alþingis, Ásta Ragnheiður Jóhannesdóttir, ávarp. Þingsetningarfundi verður síðan frestað til kl. 16.

Þegar þingsetningarfundi verður fram haldið kl. 16 verður hlutað um sæti þingmanna. Fjárlagafrumvarpi fyrir árið 2011 verður þá útbýtt. 

Stefnuræða forsætisráðherra og umræður um hana verða á mánudagskvöld 4. október, kl. 19.50. Steingrímur J. Sigfússon, fjármálaráðherra, mælir síðan fyrir fjárlagafrumvarpinu þriðjudaginn 5. október og hefst umræðan kl. 13.30.
 

• 1 blogg um fréttina

Bloggað um fréttina

• Sigurður Sigurðsson: Skyldumæting