Hollvinir mótmæla niðurskurði

 Hollvinir Heilbrigðisstofnunar Suðurnesja  mótmæla harðlega tillögum um niðurskurð á framlagi  ríkisins til rekstrar HSS fyrir árið 2011. Tillögur þessar leiði til þess að þjónustan við sjúklinga og fæðandi konur færist til Reykjavíkur sem skapar óöryggi  og óvissu.

„Ekki hefur verið sýnt fram á að flutningur á þjónustunni verði til þess að draga úr kostnaði ríkisins við þessar breytingar,“ segir í ályktun frá Hollvinunum.

Bent er á að segja verði upp fjölda starfsmanna við HSS ef mæta á kröfunni og sé það varla á bætandi þar sem atvinnuleysi á Suðurnesjum er hvað mest á landinu.

„Allt þetta er nú að gerast á sama tíma og ríkið er að leggja fram húsnæði og þar með fjármagn fyrir einkasjúkrahús á varnasvæðinu fyrrverandi.  Kadeco, fyrirtæki í eigu ríkisins, er í samstarfi við einkafyrirtæki sem stefnir að því að setja á stofn sjúkrahús.

Framlög ríkisins til HSS í samanburði við önnur sjúkrahús hafa hlutfallslega verið - og eru enn - lægst og ekki hefur verið tekið mið af nærveru þess við Keflavíkurflugvöll.

Við skorum á alla Suðurnesjamenn, sérstaklega fulltrúa í sveitarstjórnum, og þingmenn Suðurkjördæmis að bregðast við  þessum hugmyndum með viðeigandi hætti.“

• 2 blogg um fréttina

Bloggað um fréttina

• Ólafur Ragnarsson: "Botninum náð"
• Sigurður Jónsson: Suðurnesjamenn fá enn eitt vinstra höggið.