Innlent | mbl | 6.10.2010 | 15:42

Þingið er óstarfhæft

Tunnur framan við Alþingishúsið í mótmælunum 4. október. Konurnar hafa safnað tunnum og safna liði til að slá taktinn nú síðdegis. Ómar

„Við erum fimm konur á eigin vegum. Við erum ekki hluti af stjórnmálaafli. Við erum að fara af stað vegna þess að það hefur sýnt sig að þingið er í rauninni óstarfhæft í heild sinni. Það er alveg sama hvernig þú horfir á það,“ segir Ásta Hafberg en hún undirbýr mótmæli við Alþingi nú síðdegis.

Mótmælin hefjast klukkan fimm og hafa konurnar safnað tugum tómra tunna sem ætlunin er að berja eins og trommur þannig að þingheimur heyri, nú þegar tvö ár eru liðin frá falli Glitnis.

Snýst ekki hægri eða vinstri

Ásta segir málið ekki snúast um hægri eða vinstri í stjórnmálunum.

„Það skiptir ekki máli hvort er á málið frá hægri eða vinstri. Niðurstaðan er sú að þingið er vanhæft. Það hefur ekki sýnt þá burði að geta leyst úr vandamálum heimilanna á neinn raunhæfan hátt síðan hrunið varð. Það er eitthvað stórlega mikið að þinginu okkar fyrst þeir geta ekki unnið betur að málum en þetta. Hitt er svo það að minna fólk á að heimilin geta ekki beðið endalaust,“ segir Ásta sem er einstæð, fimm barna móðir.

Þarf senn að neita sér um nauðsynjar

- Hvað er mikill tími til stefnu?

„Við erum að horfa fram á 1.300 til 1.500 uppboð á næstu mánuðum. Ég sjálf persónulega, ef við tökum mig sem dæmi, er enn í þeirri stöðu að geta borgað mitt og verið til. En ég geri ekkert mikið meira,“ segir Ásta og bætir því við að ef matarverð og aðrir liðir hækki í verði muni hún þurfa að fara að ganga á forgangslistann.

„Þetta er að gerast hjá mjög mörgu fólki sem hefur hingað til getað spjarað sig. Þannig að markmiðið er að vekja athygli á því að Alþingi er vanhæft og að heimilin geta ekki tekið við meiri byrði.“

Stjórnmálastéttin hefur brugðist

Ásta telur að nú sé ekki heppilegt að efna til kosninga.

„Fjórflokkurinn hefur sýnt og sannað að hann kemst ekki upp úr skotgröfunum þá mánuði sem liðnir eru frá hruni, alveg sama hvernig maður horfir á málið og hvernig þingmenn reyna að fegra stöðuna. Þetta var tíminn sem fjórflokkurinn þurfti að setja sig til hliðar og vinna saman sem eitt afl. Þeir gerðu það ekki. Þvert móti hafa þeir tuðað og þvaðrað allan tímann. Ef fjórflokkurinn getur ekki komist úr þessu fari núna höfum við ekkert með kosningar að gera. Það eina sem gerist er að við fáum hægristjórn og stjórnarandstöðu til vinstri.“

- Hvað með nýtt framboð?

„Ég held að það eigi ekki heldur við núna. Ég held að fólk sé búið að missa svo mikið álit á flokkakerfinu sem slíku að í rauninni þyrftum við smá hlé. Við þyrftum að fá frí fyrir flokkunum og fá neyðarstjórn sem vinnur faglega að þeim verkefnum sem eru mest knýjandi, eins og málefnum heimilanna. Við ættum að leggja flokkunum í smá tíma og leyfa þeim að endurskipuleggja sig í friði.

Það er nefnilega svo skrítið það sem er að gerast núna að það eru ekki stjórnmálaflokkar eða hreyfingar á bak við þetta. Þetta er bara fólk.“