„Engin forræðishyggja“

„Ef það er búið að banna reykingar og öllum líður vel, af hverju þá ekki að banna áfengi og þá myndi öllum líða líka vel. Þetta snýst um það að fólki á að líða vel í miðborginni,“ segir Einar Örn Benediktsson, borgarfulltrúi Besta flokksins, um bókun flokksins á fundi borgarráðs í gær.

Hann segir þó að bókunin snúist ekki um að banna.

„Þetta snýst um það hvernig miðborgin eigi að vera. Í bókuninni er lýst eftir áfengisstefnu Reykjavíkurborgar en fyrir því hefur félag kráareigenda barist í þrjú ár. Þetta er engin forræðishyggja eða neitt svoleiðis. Þetta er bara til að opna umræðuna um hvað við viljum.“

Í bókun þeirra Einars Arnar og Elsu Hrafnhildar Yeoman á fundi borgarráðs í gær segir m.a. að um bann við reykingum á vínveitingastöðum ríki almenn ánægja. „Liggur því við að næsta rökrétta skref verði að banna áfengi inni á þessum stöðum, þar sem áfengisneysla hefur margar og alvarlegar afleiðingar í för með sér," segir í bókuninni. 

Einar Örn segir að löggæsla sé mikilvæg og að ástandið í miðbænum hafi batnað frá árinu 2007 þegar lögreglumenn urðu sýnilegir. Í dag sé raunin önnur og að skoða þurfi þau mál.

„Það á að vera frelsi hvers og eins að geta farið í miðborgina án þess að eiga í þeirri hættu að lenda í fulla manninum.“

• 2 blogg um fréttina

Bloggað um fréttina

• Geir Ágústsson: Leiðin til ánauðar
• Haraldur Haraldsson: „Engin forræðishyggja“/Púra foræðishyggja ekkert annað!!Hóflega drukið vín gleður mansins hjarta!!!