UngBest fordæma bókun Besta flokksins

Ungliðahreyfing Besta flokksins, UngBest, fordæma bókun borgarstjórnarflokksins sem lögð var fyrir borgarráð í gær, en þar var gert að því skóna að banna sölu áfengis á vínveitingastöðum borgarinnar.

„Ný bókun borgarfulltrúa sýnir vel í hvaða ógöngum menn lenda þegar aðferðir ríkisforsjár og skipulagshyggju verða ofan á. Ekki aðeins eru borgarfulltrúar flokksins algjörlega úr takt við grasrót flokksins með þessari bókun heldur hefur þetta gert marga af yngri ungliðum borgarinnar afhuga flokknum og er miður,“ segir í tilkynningu frá ungliðahreyfingunni.

Þá segir einnig að með bókun borgarfulltrúa Besta flokksins sé aðeins verið að gæta hagsmuna aldurshóps þeirra eigin, ekki æsku landsins. „Að auki þykir stjórn UngBest það varhugavert að borgarfulltrúar leggi fram bókun sem gangi þvert á stefnuskrá UngBest.“

Þess er einnig krafist að bókunin verði dregin til baka enda yfirgengileg, og að þeir borgarfulltrúar sem eigi hlut að máli biðji borgarbúa afsökunar.