Heróín- og morfínfíkn á niðurleið

Heróín- og morfínfíkn er á niðurleið, að því er fram kemur á vef SÁÁ. Þar segir svokölluð viðhaldsmeðferð fyrir sprautufíkla sem séu háðir heróíni eða morfíni hafi gefið góða raun. Ástandið sé gjörbreytt og árangur undanfarinn fjögurra ára hafi verið mjög góður og athyglisverður. 

Fram kemur að heróín- og morfínfíkn hafi verið nær óþekkt á íslenskum meðferðarstofnunum fram til ársins 1998. En árið 1999 hafi allt í einu birst sjúklingar á Vogi sem hafi verið  að sprauta morfíni í æð.

Þessum sjúklingum hafi fjölgað fram til ársins 2005 og úr hafi orðið mikill og alvarlegur vandi.

Þá segir að nú standi menn frammi fyrir sama vanda varðandi rítalínsnotkun.

„Í fyrsta lagi er það óvarleg og mikil sala og ávísun ritalíns. Í öðru lagi telja fáeinir geðlæknar og heimilislæknar að það sé viðurkennd og góð læknisfræði að nota slíkar töflur til að hjálpa örvandi vímuefnafíklum,“ er haft eftir Þórarni Tyrfingssyni, yfirlækni á Vogi, sem óskar eftir sömu viðbrögðum og við morfínfíkn.

„Það þarf að auka aðhald að læknum og auka og bæta meðferð fyrir amfetamínfíkla á Íslandi.“