Hvasst í Eyjum

Mjög hvasst er í Vestmannaeyjum þessa stundina og mælist vindhraði á Stórhöfða 30,9 metrar á sekúndu. Í Surtsey er vindhraðinn 24 metrar á sekúndu. Varað er við stormi á sunnan- og vestanverðu landinu í dag.

Að sögn Veðurstofunnar fer að lægja og draga úr úrkomu syðst á landinu í kvöld.

Hlýtt er á Suðurlandi og mælist hitinn nú tæp 9 stig við Markarfljót. Á Norðausturlandi er hinsvegar brunagaddur en 11,1 stiga frost mældist nú um hádegisbil á Mývatnsheiði, að því er kemur fram á vef Veðurstofunnar.