Starfsfólk gjörgæslu bakaði fyrir afmælisveisluna

Gjörgæsludeild Landspítalans í Fossvogi hélt í gær upp á 40 ára afmæli og var samstarfsfólkinu á sjúkrahúsinu boðið til mikillar veislu og einnig fyrrverandi starfsfólki.

Talið er að um 300 manns hafi kíkt í kaffi og gætt sér á kræsingum sem starfsfólkið sá sjálft um að baka. Gjörgæsludeildinni bárust góðar gjafir í tilefni dagsins, meðal annars hálf milljón króna frá Actavis og einnig fjöldi gjafa frá samstarfsfólki á sjúkrahúsinu.

Sigrún Einarsdóttir skar fyrstu sneiðina af afmælistertunni, en hún er elsti starfsmaður gjörgæsludeildarinnar og hefur unnið þar, með stuttum hléum, frá því deildin var opnuð fyrir 40 árum.