Hæstiréttur staðfestir framsal til Póllands

Hæstiréttur hefur staðfest úrskurð Héaðsdóms Reykjavíkur um að framselja pólskan ríkisborgara til heimalandsins að beiðni pólskra yfirvalda. Maðurinn sem um ræðir er fertugur að aldri og hefur búið hér í fimm ár. Hann var árið 2005 dæmdur í sjö mánaða skilorðsbundið fangelsi í Póllandi og til að greiða skaðabætur vegna peninga sem hann hafi svikið úr viðskiptavini.

Hafði hann fengið konu til að láta sig fá peninga til að kaupa efni í hitakerfi en hvorki keypt efnið né endurgreitt konunni. Átti hann að greiða henni skaðabætur fyrir fimm árum. Þess í stað fór hann til Íslands og telja pólsk yfirvöld að með því hafi hann rofið skilorðið.

Málið hefur verið í kerfinu hér á landi í talsverðan tíma en maðurinn greiddi skaðabæturnar í febrúar á þessu ári. Hins vegar telja pólsk yfirvöld að hann hafi átt að greiða þær haustið 2005 og því falli þau ekki frá framsalsbeiðninni.

Maðurinn benti á það fyrir dómi  að hann búi nú með unnustu sinni hér á landi og hafi unnið við pípulögn hjá sama fyrirtæki frá júní 2007, en hann sé lærður í þeirri iðngrein.

Hann hafi hvorki sætt refsingu áður en né eftir að hann hlaut refsidóminn sem um ræðir. Hann hafi ekki reynt að komast undan réttvísinni í heimalandi sínu, heldur flust hingað til lands að leita sér atvinnu.

• 1 blogg um fréttina

Bloggað um fréttina

• Ólafur Ingi Hrólfsson: Út með hina líka