Sýknaður af ákæru fyrir árás á lögreglu

Héraðsdómur Reykjavíkur hefur sýknað karlmann, sem er smitaður af lifrarbólgu C, af ákæru fyrir brot gegn valdstjórninni og sóttvarnalögum en maðurinn var sakaður um að hafa stungið blóðugum fingri upp í lögreglumann. Lögreglumaðurinn smitaðist ekki af sjúkdómnum.

Atburðirnir, sem ákæran spratt af, urðu á sunnudagsmorgni í maí á síðasta ári þegar lögreglan fékk tilkynningu um að maður hefði ógnað nágranna sínum með sverði.

Lögreglumenn fóru inn til mannsins sem var í annarlegu ástandi og var með blóðugan áverka á fingri. Maðurinn bar að fingurinn hefði óvart rekist utan í kinn lögreglumannsins þegar hann ætlaði að sýna honum sárið. Lögreglumaðurinn sagði hins vegar að maðurinn hefði snöggreiðst þegar hann var spurður um sárið, risið á fætur og stungið fingrinum upp í hann. 

Maðurinn var ákærður fyrir að hafa á ófyrirleitinn hátt stofnað lífi og heilsu lögreglumannsins í augljósan háska enda hætta á því að lögreglumaðurinn smitaðist af lifrarbólgu C. Héraðsdómur taldi hins vegar ekki sannað, gegn neitun sakborningsins, að hannhefði stungið fingrinum upp í lögreglumanninn en ekki væri unnt að útiloka að blóð hafi borist í munn lögreglumannsins þegar maðurinn strauk fingri um andlit hans, eins og hann sjálfur og vitni hefðu lýst.

• 1 blogg um fréttina

Bloggað um fréttina

• Ólafur Ingi Hrólfsson: Öryggisleysi lögreglunnar