Ráðinn framkvæmdastjóri Íbúðalánasjóðs

Stjórn Íbúðalánasjóðs hefur ráðið Sigurð Erlingsson, viðskiptafræðing, sem framkvæmdastjóra sjóðsins. Sigurður starfaði áður fyrir Landsbankann.  Hann mun hefja störf hjá Íbúðalánasjóði á næstu dögum en Ásta H. Bragadóttir hefur gegnt starfinu frá því í sumar.

Starf framkvæmdastjóra var auglýst að nýju í haust eftir að stjórn sjóðsins komst ekki að niðurstöðu um hvern skyldi ráða í starfið. Ásta H. Bragadóttir, aðstoðarframkvæmdastjóri sjóðsins, hefur gegnt framkvæmdastjórastarfinu frá því Guðmundur Bjarnason lét af embættinu í sumar. Hún var meðal umsækjenda þegar starfið var auglýst laust til umsóknar en dró umsókn sína til baka eftir að þáverandi félagsmálaráðherra, Árni Páll Árnason, lagði til að skipuð yrði valnefnd til þess að velja framkvæmdastjóra. Ásta sótti ekki um starfið þegar það var auglýst að nýju.

Sigurður er viðskiptafræðingur af endurskoðunarsviði frá Andrews University í Bandaríkjunum (1994), löggiltur verðbréfamiðlari (1998), með M.Sc. í viðskiptafræði frá Háskóla Íslands með áherslu á fjármál (2003) og MBA frá Háskólanum í Reykjavík (2010).

Sigurður starfaði hjá Landsbanka Íslands hf. frá 2000-2008, fyrst sem sérfræðingur í greiningardeild og síðar sem forstöðumaður á Alþjóðasviði bankans. Frá 2008 starfaði Sigurður sem verkefnastjóri og sérfræðingur í fjárhagslegri endurskipulagningu stærri fyrirtækja hjá NBI hf. Fyrir þann tíma starfaði Sigurður sem millistjórnandi á fjármálasviðum nokkurra fyrirtækja. Sigurður hefur verið stundakennari við viðskiptadeild Háskólans í Reykjavík og við Stjórnendaskóla HR frá 2001.

Sigurður er giftur Nönnu Guðnýju Sigurðardóttur sjúkraþjálfara og saman eiga þau einn son.
Sigurður mun hefja störf hjá Íbúðalánasjóði á næstu dögum.

• 3 blogg um fréttina

Bloggað um fréttina

• Ómar Geirsson: Hatar Samfylkingin konur????
• Ólafur Ingi Hrólfsson: Algjör snilld
• Magnús Óskar Ingvarsson: Komst ekki að niðurstöðu?