Innlent | mbl | 9.11.2010 | 19:07

Efnahagsleg skilyrði uppfyllt

Fánar Evrópusambandsins YVES HERMAN

Ísland fyllir öll pólitísk og efnahagsleg skilyrði aðildar að Evrópusambandinu. Þetta kemur fram í skýrslu sem framkvæmdastjórn ESB birti í dag um framvindu samningaviðræðnanna. Skýrslan er hluti af föstu verklagi í stækkunarferli ESB en í henni er lagt mat á þróun efnahags- og stjórnmála á Íslandi frá febrúar til október 2010 og reifað hvaða málefni helst þarf að ræða í fyrirhuguðum samningaviðræðum.

Í skýrslunni kemur fram að Ísland sé stöðugt lýðræðisríki með styrkar stofnanir og taki virkan þátt í baráttu fyrir mannréttindum. Þá er lokið lofsorði á lagabreytingar í því skyni að styrkja sjálfstæði íslenskra dómstóla hvað varðar skipan dómara, og er mikilvægi skýrslu Rannsóknarnefndar Alþingis og aðgerða embættis sérstaks saksóknara undirstrikað. Í skýrslunni segir jafnframt að þrátt fyrir skiptar skoðanir á Íslandi um mögulega aðild að ESB þá fari stuðningur við samningaferlið vaxandi.

Einnig er í skýrslunni að finna yfirlit um málefni fyrirhugaðra samningaviðræðna. Fram kemur að Ísland hefur þegar tekið upp stóran hluta löggjafar ESB í gegnum EES-samninginn en jafnframt bent á málefnasvið sem út af standa. Þar má nefna löggjöf um náttúruvernd, takmarkanir á erlendri fjárfestingu í sjávarútvegi, auk þess sem framkvæmdastjórn ESB leggur mat á hvar styrkja þarf stofnanir til að Ísland geti axlað skyldur og notið ávinnings mögulegrar aðildar.

Að sögn utanríkisráðuneytisins hefst hinn 15. nóvember svokölluð rýnivinna þar sem sérfræðingar Íslands og Evrópusambandsins munu fara yfir efni hina þá 33 kafla löggjafar ESB. Í þessari rýnivinnu verður nákvæmlega skilgreint hvar löggjöf Íslands og ESB er frábrugðin, um hvað þarf að semja og að því loknu verða eiginlegar samningaviðræður um einstaka kafla opnaðar.

Framvinduskýrslan verður nú þýdd á íslensku en enska útgáfu hennar er að finna hér.