Kanna lögmæti Betsson auglýsinga

Ögmundur Jónasson, dóms- og mannréttindaráðherra, hefur beint því til lögreglustjórans á höfuðborgarsvæðinu að kanna lögmæti auglýsinga frá veðmálafyrirtækinu Betsson sem birtar eru á strætisvagnaskýlum á höfuðborgarsvæðinu.

Líkt og kom fram á mbl.is í gær þá auglýsir Betsson þrátt fyrir að í júní á þessu ári hafi Alþingi samþykkt sem lög hert auglýsingabann. Sigurður G. Guðjónsson, lögmaður Betsson sagði við mbl.is í gær, að ekki væri verið að auglýsa happdrætti, auglýst sé vefsvæði.

„Þótt einhverjir áhrifamenn innan íþróttahreyfingarinnar og happdrættin á Íslandi hafi getað troðið í gegnum þingið lagabreytingu sem takmarkar auglýsingar erlendra happdrætta á Íslandi þá hefur það ekkert með auglýsingar á vefsíðum fyrirtækja að gera,“ sagði Sigurður. 

Í lögum um happdrætti, með breytingum sem gerðar voru í sumar, segir að ekki megi auglýsa, kynna eða miðla hvers konar upplýsingum um happdrætti sem ekki hefur verið veitt leyfi fyrir samkvæmt lögum eða uppfyllir ekki skilyrði laganna, óháð því hvort starfsemi þess er rekin hérlendis eða erlendis.

• 1 blogg um fréttina

Bloggað um fréttina

• Heimir Lárusson Fjeldsted: Nýir siðir í löggæslu- og dómsmálum