Íslendingafélag endurvakið

Búið er að endurvekja ÍSFÁN, félag Íslendinga í Árósum í Danmörku, en fráfarandi stjórn félagsins tilkynnti eftir aðalfund í október að félagið hefði verið lagt niður vegna áhugaleysis.

Á aðalfundinum, sem haldinn var í októberlok, mætti aðeins 1 fyrir utan fráfarandi stjórn, sem á sér þann kost vænstan, að leggja starfsemina niður. Félagið hefur starfað í 40 ár í Árósum. 

Þegar fréttir bárust af þessu komu fram óskir um að efna til framhaldsfundar, sem haldinn var í gær.  Á fundinn mættu um 15 manns og tókst að manna nýja stjórn félagsins og fá fólk í þorrablótsnefnd.

Á heimasíðu félagsins segir nýja stjórnin, að þrátt fyrir allt sé ljóst, að  mikill áhugi sé fyrir áframhaldandi starfsemi á vegum félagsins.  Það sýni þáttaka í þeim atburðum sem félagið hafi staðið fyrir fram til þessa. Þannig hafi verið metþáttaka á árlegt jólaball í fyrra.  Þá mættu 150 manns mættu í skötuveislu, uppselt var í mat á þorrablót í byrjun þessa árs og nú sé þegar kominn biðlisti í mat á þorrablótið 2011.

Þá hafi mikill fjöldi mætt á 17. júní hátið félagsins í sumar þrátt fyrir hellirigningu. Voru grillaðar 220 SS pylsur, sem allar hurfu ofan í landann.

Heimasíða ÍSFÁN

• 1 blogg um fréttina

Bloggað um fréttina

• Bergljót Gunnarsdóttir: Íslendingafélag af leiðinlegri gerðinni?