Enginn er í haldi lögreglu vegna rannsóknar embættis sérstaks saksóknara á málum tengdum Glitni fyrir hrun. Að sögn Ólafs Þórs Haukssonar, sérstaks saksóknara stóðu yfirheyrslur yfir til miðnættis í gær og var öllum sleppt að þeim loknum. Ekki verður farið fram á gæsluvarðhaldsúrskurð yfir þeim sem voru yfirheyrðir og enginn var handtekinn.

Að sögn Ólafs var húsleitum lokið í nótt en þær voru flestar á höfuðborgarsvæðinu. Einnig var leitað á Akureyri og í Rangárvallasýslu.

 Rannsókn málsins er umfangsmikil og verður haldið áfram. Í framhaldinu verður metið hvort leitað verður til lögregluyfirvalda í öðrum ríkjum eftir aðstoð en ekkert slíkt er í gangi nú.

Í tilkynningu sem embætti sérstaks saksóknara sendi frá sér vegna málsins í gær kom fram að húsleitir og yfirheyrslurnar hefðu verið framkvæmdar vegna fimm mála: 1) Lánveitingar til félagsins Stím hf. 2) Lánveitingar til félagsins FS 38 ehf. vegna kaupa á Aurum Holding, en skaðabótamál sem slitastjórn Glitnis hefur höfðað fyrir Héraðsdómi Reykjavíkur á hendur fyrrverandi eigendum og stjórnendum Glitnis tengist sama máli. Rétt er að benda á að skaðabótamálið sem slitastjórnin hefur höfðað gegn sama hópi fyrir dómstóli í New York er síðan aðskilið. 3) Kaup Glitnis á hlutabréfum í Tryggingamiðstöðinni. 4) Kaup fjárfestingasjóðs á vegum Glitnis á skuldabréfi útgefnu af Stím. 5) Lánveitingar Glitnis til Landic Property, Baugs og 101 Capital vegna kaupa á danska fasteignafélaginu Keops. 

Tengdar fréttir

Aurum Holding-málið

Aurum Holding ekki fyrir Hæstarétt

• Feginn að komið sé að endimörkum
• 59 milljónir falla á ríkissjóð
• Allir sýknaðir í Aurum-málinu
• „Ég er bara lítill fjárfestir“

» Fleiri tengdar fréttir

• 1 blogg um fréttina

Bloggað um fréttina

• Elín Erna Steinarsdóttir: Hvað vantar?