Fleiri á nagladekkjum í ár en í fyrra

31,6% ökutækja reyndist vera á negldum dekkjum þegar talning var gerð 17. nóvember síðastliðinn og 68,4% á öðrum tegundum dekkja. Fyrir ári síðan var talið í sömu viku og þá var hlutfall þeirra ökutækja á negldum dekkjum 23,6% og fyrir tveimur árum 35,0%.

Hlutfall bifreiða á negldum dekkjum mælist yfirleitt hæst í febrúar ár hvert. Verulega hefur dregið úr notkun nagladekkja eða úr 67% í febrúar 2001 í 39% í febrúar 2010. Enn er óljóst hvort þessi fjölgun í nóvember sé vísbending um hátt hlutfall í febrúar næstkomandi, segir í tilkynningu frá umhverfissviði Reykjavíkurborgar.

Reykjavíkurborg telur óþarft að nota nagladekk í borginni bæði vegna snjóléttra vetra og góðrar vetrarþjónustu. Nagladekk spæna upp malbik og auka líkur á svifryksmengun. Borgargötur eru yfirleitt annað hvort þurrar eða blautar en sjaldan á kafi í snjó eða ísilagðar og kannanir hafa sýnt að nagladekk eru ekki öruggari en önnur vetrardekk í borgum.

Styrkur svifryks hefur farið 25 sinnum yfir sólarhrings-heilsuverndarmörk á árinu, þar af átta sinnum vegna öskufjúks frá Eyjafjallajökli, fjórtán skipti má rekja beint eða óbeint til bílaumferðar, tvö skipti til flugelda og eitt skipti er óútskýrt.

• 1 blogg um fréttina

Bloggað um fréttina

• Ómar Ragnarsson: Hreint með ólíkindum.