Fer fram á lögreglurannsókn á njósnum

Kári Stefánsson, forstjóri Íslenskrar erfðagreiningar, fer fram á að Ríkislögreglustjóri kanni hvort tilefni sé til lögreglurannsóknar á meintum njósnum Kínverja hér á landi á starfsemi fyrirtækis síns. Þetta kom fram í fréttum RÚV.

Kínverjar eru taldir stunda iðnnjósnir, sem beinast að rannsóknum fyrirtækja á sviði erfðagreiningar og læknisfræði hér á landi. Þetta kemur fram í skýrslum bandaríska sendiráðsins í Reykjavík til utanríkisráðuneytisins í Washington.

Skjölin eru á meðal þeirra sem lekið var til vefsíðunnar WikiLeaks, sagði í Fréttablaðinu í gær en blaðið hefur hluta gagnanna undir höndum.

Í skýrslu, sem dagsett er 26. febrúar í fyrra, er fjallað um ástand öryggismála á Íslandi. Þar segir: „Talið er að Kínverjar stundi iðnnjósnir á sviði erfðagreiningar og læknisfræðilegra rannsókna á Íslandi."

Skjalið er merkt „leyndarmál" og afrit send leyniþjónustunni CIA, alríkislögreglunni FBI og leyniþjónustu hersins, DIA.

Í annarri skýrslu, sem send er á aðfangadag í fyrra og sömuleiðis merkt sem leyndarmál, er greint frá árlegum fundi gagnnjósnahóps sendiráðsins sem Sam Watson, staðgengill sendiherra, stjórnaði. Þar kemur fram að Bandaríkjamenn telji að Kínverjar „haldi áfram" iðnnjósnum á Íslandi, annars vegar með hefðbundnum njósnum (human intelligence) og hins vegar með tæknibúnaði, en það getur falið í sér símhleranir og njósnir á netinu, til dæmis innbrot í gagnabanka.

Í sama skjali segir að talið sé að Rússar fylgist með njósnum Kínverja. Staðgengill sendiherra Rússlands í Reykjavík sé álitinn sérfræðingur í málefnum Kína. Þar mun átt við Valery I. Birjúkov sendiráðunaut, en hann starfaði meðal annars í Kína á vegum sovézku utanríkisþjónustunnar á níunda áratugnum, segir í frétt Fréttablaðsins.

• 1 blogg um fréttina

Bloggað um fréttina

• Arngrímur Stefánsson: Ekkert óeðlilegt við þá ósk