Mótmæla útsvarshækkun á Seltjarnarnesi

Baldur, félag ungra sjálfstæðismanna á Seltjarnarnesi, mótmælir harðlega fyrirhuguðum útsvarshækkunum bæjarstjórnar Seltjarnarnes og telur þær með öllu óréttlætanlegar, sérstaklega á tímum sem þessum þar sem ríkisstjórn vinstrimanna herjar á fjárhag fjölskyldna í landinu, segir orðrétt í fréttatilkynningu frá Baldri en Sjálfstæðisflokkurinn fer með meirihlutann í bæjarstjórn Seltjarnarness.

Ógnar stöðu fyrirmyndir bæjarfélags

„Fyrirhugaðar aðgerðir bæjarstjórnar ógna sérstöðu Seltjarnarnesbæjar sem fyrirmyndar bæjarfélags og eru ekki í takt við þau kosningarloforð sem gefin voru fyrr á þessu ári. Kjósendur flokksins hljóta að krefjast svara frá bæjaryfirvöldum um hvað hafi farið úrskeiðis í fjármálum bæjarins og hvers vegna þessi leið sé farin.

Baldur telur að þeir fulltrúar Sjálfstæðisflokksins í bæjarstjórn sem séu fylgjandi fyrirhuguðum skattahækkunum séu að bregðast grundvallarhugsjónum Sjálfstæðisflokksins um hóflega skattlagningu og frelsi einstaklingsins.

Bæjarbúar hafa margir orðið fyrir mikilli tekjuskerðingu undanfarið og ættu bæjaryfirvöld að leitast við að draga úr útgjöldum til að létta fjárhagslega byrði þeirra, en ekki leita í hugmyndasmiðju sósíalista sem aðeins vilja hækka skatta, slá fleiri lán og auka útgjöld.

Útgjöld bæjarins hafa hækkað að meðaltali um 14 prósent á ári seinustu níu árin í tíð Sjálfstæðisflokksins og er kominn tími til að hverfa af þeirri braut. Mikilvægt er að Sjálfstæðisflokkurinn á Seltjarnarnesi læri af mistökum fyrri ára og skeri niður útgjöld í stað þess að skattpína bæjarbúa eins og vinstrimanna er siður," segir í fréttatilkynningu frá Baldri.

• 1 blogg um fréttina

Bloggað um fréttina

• Páll Vilhjálmsson: Skattar og Sjálfstæðisflokkurinn