Bílum lagt ólöglega út um alla borg

Mikið er um stöðubrot í Reykja­vík en um helg­ina hafði lög­regl­an af­skipti af hátt í fimm hundruð öku­tækj­um vegna þessa, jafnt á miðborg­ar­svæðinu sem ann­ars staðar. Þetta kem­ur fram á vef lög­regl­unn­ar.

Þannig var bíl­um t.d. lagt ólög­lega við Laug­ar­dals­höll og Grafar­vogs­kirkju en á báðum stöðum voru næg bíla­stæði í aðeins 2-3 mín­útna göngu­færi frá áður­nefnd­um stöðum.

Þá ber sömu­leiðis nokkuð á því að full­frísk­ir ein­stak­ling­ar nýti sér stæði sem eru sér­merkt fötluðum. Full­orðin, fötluð kona sem býr á miðborg­ar­svæðinu þurfti t.d. að hringja í lög­regl­una í tvígang um helg­ina en í bæði skipt­in var það vegna óforskammaðra bíl­stjóra sem lögðu í einka­stæðið henn­ar þrátt fyr­ir að það sé kyrfi­lega merkt með viðeig­andi hætti, seg­ir á vef lög­regl­unn­ar.

Sem fyrr hvet­ur lög­regl­an öku­menn til að leggja lög­lega, m.a. til að þeir kom­ist hjá út­gjöld­um en nú er 5000 kr. sekt vegna stöðubrots en gjaldið renn­ur í Bíla­stæðasjóð.

• 2 blogg um frétt­ina

Bloggað um frétt­ina

• Heim­ir Lárus­son Fjeld­sted: Gangtregða
• Har­ald­ur Bjarna­son: Hvað greiðir borg­in rík­inu fyr­ir þjón­ust­una?