Hlynntur gjaldtöku á notkun nagladekkja

Samgönguráðuneytið vinnur nú drög að frumvarpi til nýrra umferðarlaga sem lagt verður fyrir Alþingi eftir áramót. Þar er meðal annars að finna efnisgrein sem fjallar um að heimila sveitarfélögum gjaldtöku á notkun nagladekkja.

Karl Sigurðsson, borgarfulltrúi Besta flokksins, segist vona að þessi hugmynd nái fram að ganga. „Mér skilst að þetta sé í nefnd hjá Alþingi og nú er verið að ræða þetta fram og til baka.

Við fáum þetta svo til umsagnar í ráðuneytinu og ef þessi klausa helst inni mun Reykjavíkurborg vinna að því að heimila einhvers konar gjaldtöku á notkun nagladekkja svo að beinn og heilsufarslegur kostnaður vegna svifryks verði greiddur af þeim sem valda honum. Ef hún helst ekki inni eigum við eftir að segja okkar.“

Aðspurður hvort búið sé að ákveða hvers konar gjaldtöku eigi að taka upp segir Karl að öll vinna sé enn á hugmyndastigi. „Það er ekki einu sinni komin tillaga, svo við bíðum róleg eftir að Alþingi klári sitt.“