Þjóðvegurinn lokaður vegna vatnavaxta

Vegna vatnavaxta og skemmda á brúnni yfir Seljalandsá, í nágrenni Markarfljóts, er þjóðvegur 1 lokaður eins og er, meðan verið er að kanna skemmdir. Vegagerðin er komin á vettvang. Þetta kemur fram í tilkynningu frá Fjarskiptamiðstöð ríkislögreglustjóra.

Unnið er að því að finna hjáleið, vonast er til að upplýsingar um það liggi fyrir kl. 17.

Að sögn Vegagerðarinnar er enn vonskuveður á Austurlandi, flughált er í kringum Egilsstaði og upp að Biskupshálsi. Þæfingsfærð er á Vopnafjarðarheiði. Ófært er um Vatnsskarð eystra, Fjarðarheiði, Fagradal og Oddskarð. Þó er fært frá Reyðarfirði til Eskifjarðar og einnig suður úr.

Hálkublettir eru á Bröttubrekku og Fróðárheiði og sumstaðar í Dölunum.

Flughált er í Reykhólasveit, á köflum í Ísafjarðardjúpi. Hálka eða hálkublettir eru á flestum öðrum leiðum á Vestfjörðum. Þæfingsfærð er norður í Árneshrepp.

Á Norðurlandi vestra er Hringvegurinn auður austur í Skagafjörð en hálkublettir á Þverárfjalli og víða á útvegum.

Á Norðurlandi eystra er hálka eða hálkublettir á öllum leiðum. Þæfingur á Hólasandi.

Vegir eru auðir á Suður- og Suðvesturlandi.

• 1 blogg um fréttina

Bloggað um fréttina

• Helgi Þór Gunnarsson: Nú er gott að vera heima!!!!!