Merking sett á styttu Jóns Sigurðssonar

Merking hefur verið sett á styttuna af Jóni Sigurðssyni á Austurvelli en á nýársdag rennur upp afmælisár Jóns en hann fæddist á Hrafnseyri við Arnarfjörð 17. júní 1811.

Afmælisins verður minnst með margvíslegum hætti allt árið en merking styttu Jóns Sigurðssonar á Austurvelli markar upphaf afmælishaldsins, segir í tilkynningu.

Einar Jónsson myndhöggvari gerði styttuna og lágmyndina „Brautryðjandinn“ í tilefni af 100 ára afmæli Jóns Sigurðssonar 1911 og hún var reist fyrir framan Stjórnarráðshúsið 10. september það ár. Styttan var flutt á Austurvöll 1931. Strax árið 1911 var rætt um að merkja styttuna og oft hefur verið minnst á það síðan en aldrei orðið af því fyrr en nú.

Það eru forsætisráðuneytið og Listasafn Einars Jónssonar sem standa að merkingunni að tillögu afmælisnefndar Jóns Sigurðssonar.

Merkingin er koparplata á bakhlið fótstalls styttunnar og afhjúpuðu þær Sólveig Pétursdóttir formaður afmælisnefndar Jóns Sigurðssonar og Júlíana Gottskálksdóttir forstöðumaður Listasafns Einars Jónssonar merkinguna í dag.

Merking á styttu Jóns Sigurðssonar mbl.is/Ernir Eyjólfsson

• 1 blogg um fréttina

Bloggað um fréttina

• Hörður B Hjartarson: Ég hefði viljað sjá