Innlent | mbl | 3.1.2011 | 19:32

Engin skelfing um borð

Arnór G. Jónsson. Myndin er tekin af Facebook-síðu Arnórs með hans leyfi.

„Rétt fyrir lendingu kom flugstjórinn í kallkerfið og sagði að það væri viðvörunarljós um reyk í farangursrými. Hann taldi ólíklegt að þetta væri raunveruleg hætta en vildi þó samt vera við öllu búinn,“ segir Arnór G. Jónsson, einn farþega í vél Flugfélags Íslands, sem lenti í Bergen í kvöld.

„Flugstjórinn reyndi að fullvissa farþeganna um að líklega væri þetta fölsk aðvörun, eins og kom í ljós síðar meir. Það var greinilega búið að tilkynna þetta í flugturninn og okkar biðu blikkandi ljós og brunaliðsmenn þegar við lentum.“

- Skynjaðirðu hræðslu í vélinni?

„Nei. Ég gerði það nú ekki - ekki beinlínis. Ég og kona mín vorum með fjögur börn með okkur og höfðum í sjálfu sér ekki miklar áhyggjur af þessu. Við vorum komin yfir land og sáum borgina. Þannig að við vorum ekki út í buskanum ef eitthvað kæmi fyrir.“

Arnór rekur viðvörunarmerkið til úrkomu á flugvellinum í Egilsstöðum.

„Mín kenning er sú að þetta megi rekja til millilendingar á Egilsstöðum þar sem við þurftum að millilenda út af vopnaleit. Þá þurftum við að fara út úr flugvélinni með allt okkar hafurtask í grenjandi rigningu og inn í vélina aftur. Við þetta blotnaði allur farangur en flugstjórinn sagði að líklega væri þetta út af raka í farangursrými.“

Arnór er búsettur í Bergen ásamt konu sinni Söru Ögmundsdóttur og fjórum börnum. Sjálfur er hann í meistaranámi við háskóla borgarinnar.