Vilja að umsamdar hækkanir nái til allra

Það flækir glímuna við endurnýjun kjarasamninga, að stórir hópar launafólks, millitekjuhóparnir, hafa setið eftir í kjarasamningum á umliðnum árum. Þeir telja nú tíma til kominn að umsamdar launahækkanir nái til allra.

Launakröfur sem fram eru komnar á almenna vinnumarkaðinum eru ólíkar hvað þetta varðar og hefur þetta valdið misklíð á vettvangi ASÍ.

Í umfjöllun um kjaramálin í Morgunblaðinu í dag bendir Guðmundur Gunnarsson, formaður Rafiðnaðarsambandsins, á, að millitekjuhóparnir í iðnaðarmannasamfélaginu og nálega helmingur VR-félaga hafi gefið eftir sinn hlut af almennum launahækkunum í seinustu samningum svo leggja mætti meira í púkkið til að hækka lægstu launin.

Starfsgreinasambandið hefur krafist þess að lægstu laun nái 200 þúsund kr., kaupmáttur verði endurheimtur og hinum lægst launuðu verði tryggðar auknar kjarabætur.