Sagt nánast áhættulaust

Stofnfjáreigendum Sparisjóðs Svarfdæla var kynnt þátttaka í stofnfjáraukningu sjóðsins árið 2007 sem allt að því áhættulaus fjárfesting. Þetta segir Jóhann Ólafsson, stofnfjáreigandi í sjóðnum, í samtali við Morgunblaðið.

Eins og Morgunblaðið hefur sagt frá barst stofnfjáreigendum sparisjóðsins bréf í lok nóvember 2007 þess efnis að Saga Capital byðist til að fjármagna þátttöku stofnfjáreigenda í stofnfjáraukningu sjóðsins.

Í umfjöllun um málið í Morgunblaðinu í dag segir Jóhann, að stofnfjáreigendum hafi ekki verið heimilt að fara með lánasamningana heim til nánari skoðunar: „Í raun og veru var okkur ekki gefinn kostur á að fara með pappírana út úr Sparisjóði Svarfdæla til að lesa þá, því það þurfti að gera þetta með miklum hraði,“ bætir hann við.

Sparisjóðnum tókst að ljúka stofnfjáraukningunni fyrir áramót. Þar af leiðandi var stjórnendum gert kleift að taka þátt í hlutafjáraukningu í Fjárfestingafélaginu Kistu, sem lauk einnig fyrir áramót 2007. Kista var í eigu nokkurra sparisjóða. Það félag fjárfesti aðallega í Exista, en einnig í félögum á borð við Eik banka, þó í miklu minni mæli.