Lögreglumaður í röðum mótmælenda

Einn þeirra erlendu aðgerðasinna, sem komu hingað til lands sumarið 2005 til að mótmæla byggingu Kárahnjúkavirkjunar, var í raun breskur lögreglumaður í dulargervi. Að sögn blaðsins Guardian var lögreglumaðurinn í 7 ár í gervi mótmælenda en er nú talinn hafa gengið til liðs við þá í raun og veru.

Guardian segir, að maðurinn, sem nefndi sig Mark Stone en heitir í raun Mark Kennedy, birst í röðum aðgerðasinna árið 2003.  Hann hafi síðan tekið virkan þátt í starfi þeirra á Bretlandseyjum en jafnframt veitt lögreglunni nákvæmar upplýsingar. Þannig hafi Kennedy tekið þátt í flestum umfangsmestu mótmælaaðgerðum á Bretlandseyjum og jafnvel aðstoðað við að skipuleggja sumar þeirra.  Þá hafi hann ferðast til 22 landa, með því að nota falsað vegabréf, og tekið þátt í mótmælaaðgerðum, þar á meðal til Íslands.

Að sögn blaðsins tók Kennedy þátt í mótmælum gegn G8 fundinum í Skotlandi árið 2005 og í kjölfarið fór hann til Íslands til að taka þátt í mótmælum Saving Iceland gegn Kárahnjúkastíflunni og Alcoa.

Fram kemur að Kennedy búi nú utan Bretlands en ýmislegt bendi til þess að hann sjái eftir gerðum sínum. Þannig segist hann, í tölvupóstsendingum til aðgerðasinna og lögmanna þeirra, vilja aðstoða þá í málaferlum sem nú standa yfir. 

• 2 blogg um fréttina

Bloggað um fréttina

• Axel Jóhann Axelsson: Lögga með Stokkhólmsheilkenni
• Ómar Ragnarsson: Júdas er enn hér.