Innlent | mbl | 16.1.2011 | 12:15

Keðjusöngur við stjórnarráðshúsið

Björk og Ómar sýndu tilþrif á karaókmaraþoni í Norræna húsinu sem efnt var til vegna undirskriftasöfnunarinnar. mbl.is/Ernir

Áskorun nær 50.000 Íslendinga um endurheimt orkuauðlindanna verður afhent stjórnvöldum undir keðjusöng sem hefst fyrir utan Stjórnarráðið á mánudag klukkan tíu! Þetta kemur fram í tilkynningu frá Orkuauðlindum.

Aðstandendur undirskriftasöfnunar á vefnum orkuaudlindir.is eru boðaðir til fundar við forsvarsmenn ríkisstjórnarinnar klukkan tíu í fyrramálið áður en þingfundur hefst. Þar munu þeir ræða um áskorun til stjórnvalda um að vinda ofan af einkavæðingu helstu orkufyrirtækja landsins og að láta hið bráðasta fara fram þjóðaratkvæðagreiðslu um eignarhald og nýtingu orkuauðlindanna.

„Aðstandendur undirskriftasöfnunarinnar munu þá afhenda stjórnvöldum nær fimmtíu þúsund undirskriftir sem safnast hafa og biðja nú alla sem bera hag lands og þjóðar fyrir brjósti, og geta fengið sig lausa klukkan tíu á mánudagsmorgni, að mæta fyrir framan Stjórnarráðshúsið við Lækjargötu og láta rödd sína hljóma.

Syngjum stjórnvöldum áskorun með keðjusöng sem berst um land allt!

Sá ég spóa suður´ í flóa,
Syngur lóa út´í móa:
,,Bí, bí, bí, bí.”
Vorið er komið víst á ný.

Með von um samstillingu!“ Á þeim orðum endar tilkynning aðstandenda undirskriftasöfnunarinnar.