Ávallt verði tvær þyrlur til staðar

Ögmundur Jónasson, innanríkiráðherra, segir, að reynt verði að búa þannig um hnútana að hér verði ávallt tvær þyrlur til staðar en báðar þyrlur Landhelgisgæslunnar eiga að fara í stóra skoðun á þessu ári. 

Kristján L. Möller, þingmaður Samfylkingarinnar, vakti athygli á því á Alþingi í dag, að Landhelgisgæslan væri með tvær þyrlur, TF-LIF, sem Gæslan á, og TF-GNA, sem er í leigu frá Noregi. Nú sé LÍF að fara í skoðun í apríl og sú skoðun geti tekið 4-8 vikur. Í september fari GNÁ á samskonar skoðun. Því sé útlit fyrir að aðeins verði ein þyrla til taks í allt að 4 mánuði á árinu.

Ögmundur sagðist hafa átt fund með forstjóra Landhelgisgæslunnar um málið í morgun. Verið væri að skoða möguleika á að leigja eina eða tvær þyrlur. Einnig sé verið að skoða aðra fjármögnunarmöguleika þannig að innlendir aðilar, t.d. lífeyrissjóðir, gætu keypt þyrlu og leigt ríkinu hana á hagstæðari kjörum en Norðmenn gera nú.

„Hagstæðasta úrræðið væri að sjálfsögðu það að við festum sjálf kaup á þyrlu. Vandinn er að við höfum ekki peninga til ráðstöfunar; það er stundum dýrt að vera fátækur," sagði Ögmundur.   

• 1 blogg um fréttina

Bloggað um fréttina

• Benedikt V. Warén: Þar af alltaf ein á Egilsstaðaflugvelli.