Úrskurðarnefnd virðir ekki lög

Samtök atvinnulífsins telja að úrskurðarnefnd sem starfar samkvæmt lögum um hollustuhætti og mengunarvarnir virði ekki lög þar sem nefndin hafi aðeins í eitt skipti af 20 úrskurðað áður en lögbundinn frestur rann út. 

Samtök atvinnulífsins hafa kannað hversu langan tíma það tekur úrskurðarnefnd sem starfar samkvæmt lögum um hollustuhætti og mengunarvarnir að kveða upp úrskurði í þeim málum sem þangað er beint. Þau mál sem nefndin fjallar um tengjast meðal annars starfsleyfum fyrirtækja og ýmsum þáttum sem umrædd lög taka til. Aðeins í eitt skipti af 20 hefur úrskurðarnefndin kveðið upp úrskurð innan lögbundinna tímamarka en að meðaltali tók það nefndina 40 vikur að kveða upp úrskurð sinn eða sem nemur tíföldum lögbundnum fresti (4 vikur) í hefðbundnum málum.

Í viðameiri málum er lögbundinn hámarksfrestur 8 vikur en sá úrskurður sem næstskemmstan tíma tók var kveðinn upp 9 vikum frá kæru. Úrskurðir í 7 málum voru kveðnir upp eftir 3-6 mánuði, í 5 tilvikum eftir 6-9 mánuði, í þremur málum eftir 9-12 mánuði, í einu eftir 16 mánuði, í öðru eftir 27 mánuði og í enn einu eftir 39 mánuði.

• 2 blogg um fréttina

Bloggað um fréttina

• Gísli Foster Hjartarson: Eru menn ekki að grínast?
• Guðrún María Óskarsdóttir.: Góð og réttmæt ábending um lélega stjórnsýsluhætti.