Innlent | mbl | 18.2.2011 | 6:17

Olían streymir úr Goðafossi

Goðafoss á strandstað. Myndin er af vef norsku strangæslunnar.

Goðafoss, gámaskip Eimskips, sem strandaði á áttunda tímanum í gærkvöldi í innsiglingunni í Fredrikstad í Noregi, lekur nú olíu beggja vegna miðskips.

Olían hefur lekið í 2,5 sjómílur vest-suð-vestur af skipinu og eini þjóðgarður Noregs í hafi er í hættu, samkvæmt frétt í norska Aftenposten í dag.

Nú er verið að reyna að girða skipið af, þannig að olían haldist á afgirtu svæði. Samkvæmt upplýsingum á vef norsku strandgæslunnar eru aðstæður á strandstað með ágætum.

Samkvæmt upplýsingum frá Landhelgisgæslunni eru slíkar olíuvarnargirðingar blásnar upp og þær fljóta síðan á sjónum. Í girðingunni er efni sem dregur olíuna að sér.

Skipið strandaði á Kvernskjær, sem er á milli Asmaløy og Kirkøy rétt fyrir utan Hvaler. Olíufarmurinn er talinn vera 800 tonn af þungolíu, sem er óhreinsuð jarðolía. Einnig 493 gámar um borð.

Lekinn er í tveimur tönkum miðskips, sem hvor um sig tekur 250 tonn.

Norska siglingamálastofnunin er á staðnum til að meta aðstæður.

Strandstaðurinn er ekki langt frá landamærum Noregs og Svíþjóðar. Því er sænska strandgæslan í viðbragðsstöðu, leki olían inn á yfirráðasvæði þeirra.

Skipið, sem er 165 metra langt og og 14664 tonna gámaflutningaskip, hafði nýlega sagt skilið við hafnsögubát þegar það strandaði. Engan hefur sakað um borð.