Glitnismálið tekið upp að nýju

Dómstóll í New York hefur ákveðið að taka upp að nýju mál gegn sjö fyrrverandi eigendum og stjórnendum Glitnis. Þetta kom fram í kvöldfréttum Sjónvarpsins.

Samþykkt hafði verið að vísa málinu frá gegn því skilyrði að sjömenningarnir skrifuðu undir yfirlýsingu um að hægt væri að ganga að eignum þeirra í Bandaríkjunum ef á Íslandi félli dómur slitastjórn í hag. Tveir neituðu að skrifa undir slíka yfirlýsingu, þeir Pálmi Haraldsson og Hannes Smárason, og taldi dómstóllinn því að skilyrði fyrir frávísun væru brostin.

Raunar birtist í kvöld yfirlýsing frá Hannesi Smárasyni á vef dómstólsins þar sem hann fellst á kröfur dómsins fyrir frávísun málsins. Samskonar yfirlýsingu höfðu fimm aðrir, sem málið beinist gegn, og endurskoðunarfyrirtækið PricewaterhouseCoopers, skrifað undir áður. 

Ekki er ljóst hvenær málið verður tekið fyrir.