Frumlegur gjörningur, líkamsræktargjörningur, var framinn í Sporthúsinu í gær. Fimmtíu konur frá CrossFit Sport gerðu hvorki fleiri né færri en 5.000 upphífingar á einni klukkustund.
Þeim til halds og trausts voru jafnmargir karlar sem hvöttu konurnar til dáða; aðstoðuðu þær, nudduðu ef þurfti og dekruðu við þær með ýmsum öðrum ráðum meðan á þrekrauninni stóð.
Allt var þetta gert til styrktar kvennadeild Landspítalans og var gjörningnum ætlað að verkja athygli á þeirri hetjudáð, hlutverkaskipan og upplifun sem fylgir hverri barnsfæðingu á deildinni. Samhliða gjörningnum var áheitasöfnun og markmiðið að safna einni milljón króna.
Gjörningurinn er hluti af landssöfnun Lífs, styrktarfélags kvennadeildarinnar.