Vantraust á hina fulltrúana

Árni Þór Sigurðsson, þingmaður Vinstri grænna, sagði á Alþingi í dag, að aðrir þingflokkar hefðu undirritað vantraust á þá fulltrúa sína í landskjörstjórn, sem sögðu af sér nýlega, með því að tilnefna þá ekki á ný til setu í nefndinni. 

Sagði Árni Þór í umræðu um störf þingsins, að þingflokkur VG hefði ákveðið að tilnefna Ástráð Haraldsson á ný í landskjörstjórn til að lýsa yfir trausti á hann. 

Nokkur kurr varð í þingsalnum vegna þessara orða Árna Þórs. Þorgerður Katrín Gunnarsdóttir, þingmaður Sjálfstæðisflokks, sagði að  þingflokkur sjálfstæðismanna hefði ekki með nokkru móti verið með tilnefningu sinni í nýja landskjörstjórn að lýsa yfir vantrausti við fyrri fulltrúa flokksins þar.

Ólína Þorvarðardóttir, þingmaður Samfylkingarinnar, sagði í umræðunni að Alþingi hefði orðið á í messunni við kjör í landskjörstjórn vegna þess að skipan í stjórnina hafi ekki verið í samræmi við jafnréttislög.

Ásta Ragnheiður Jóhannesdóttir, forseti Alþingis, vakti athygli á að um hefði verið að ræða kosningu, þar sem þingflokkar tilnefndu sína fulltrúa, en ekki skipan.

• 3 blogg um fréttina

Bloggað um fréttina

• Guðrún María Óskarsdóttir.: Til háborinnar skammar fyrir Vinstri Græna.
• Gunnar Heiðarsson: Valdhroki !!
• Sigríður Laufey Einarsdóttir: Traðkað á dómi Hæstaréttar.