Eyjamenn sýnt langlundargeð

„Eyjamenn hafa sýnt gríðarlegt langlundargeð. Þetta er búið að vera djöfullegt en stendur þó til bóta,“ segir Kristín Jóhannsdóttir, markaðsfulltrúi Vestmannaeyja, um ástandið í samgöngumálum fyrir Eyjamenn.

Sem kunnugt er hafa siglingar með Herjólfi til Landeyjahafnar gengið brösuglega í vetur. Engin ferð hefur verið farin þangað síðan 12. janúar sl. og Herjólfur hefur orðið að sigla til Þorlákshafnar.

Í fréttaskýringu um samgöngumál Vestmannaeyja í Morgunblaðinu í dag kemur fram, að frá áramótum hafi 170 áætlunarferðir verið með ferjunni en 15 þeirra hafa verið felldar niður vegna veðurs. Frá áramótum til 12. janúar voru 35 ferðir farnar til og frá Landeyjahöfn.

Kristín segir mikið hafa verið um afbókanir ferðamanna í vetur og ferðaþjónustufyrirtækið orðið að berjast til að lifa veturinn af. En nú hafi Eyjamönnum verið gefnar vonir um að Landeyjahöfn komist brátt í gagnið á ný.