Hámark sett á laun verkalýðsforingja

Þingmenn Hreyfingarinnar hafa lagt fram frumvarp á Alþingi um að hámarkslaun forsvarsmanns verkalýðsfélags og hagsmunasamtaka launafólks megi ekki vera hærri en þreföld lágmarkskjör í því verkalýðsfélagi eða hagsmunasamtökum sem hann veitir forstöðu.

„Flutningsmenn frumvarpsins telja mikilvægt að sett sé hámark á laun forsvarsmenn verkalýðsfélaga og hagsmunasamtaka launafólks. Að baki slíku hámarki eru rík sanngirnissjónarmið enda eru þessi laun greidd úr sameiginlegum sjóðum verkalýðsins. Með frumvarpinu væru samningsfrelsi settar nokkrar skorður enda yrði ólöglegt að semja um hærri laun en sem nemur þreföldum lágmarkskjörum. Við ákvörðun þessa hámarks var þó gætt meðalhófs og ekki gengið of nærri samningsfrelsi aðila. Með því að kveða á um þreföld lágmarkskjör er enn fremur talið tryggt að hámarkið sé ákvarðað þannig að launin séu samkeppnishæf svo að hæft fólk fáist til starfans og ákvæðið dragi ekki úr hvata þeirra sem hæfastir eru til að sinna því.

Flutningsmenn telja jafnframt rétt að vekja athygli á því að setning hámarks sem er á þennan hátt bundið lágmarkskjörum getur verið forsvarsmönnum mikilvægur hvati til að berjast fyrir bættum rétti félagsmanna þar sem hækkun lágmarkslauna getur leitt til beinnar hækkunar launa þeirra,“ segir í greinargerð með frumvarpinu.

• 7 blogg um fréttina

Bloggað um fréttina

• Gísli Foster Hjartarson: En hjá framkvæmdastjórum? Er þetta ekki....
• Björn Birgisson: Þrisvar sinnum lágmarkslaun?
• Sigurður Haraldsson: Frábært framtak.
• Magnús Helgi Björgvinsson: Úps hvernig fer fólk að þessu?
• Kristin stjórnmálasamtök: Setjum verkalýðsforingjum stólinn fyrir dyrnar – og minnt á stjórnlagaþing!
• Guðrún María Óskarsdóttir.: Óska Hreyfingunni til hamingju með afskipti af kjörum launamanna.
• Baldur Gautur Baldursson: Keisarinn í Kína og læknir hans