Kastaði snjóboltum úr bíl

Lögreglumenn á ómerktri lögreglubifreið á leið í verkefni veittu  í síðustu viku athygli einkennilegu aksturslagi bifreiðar á Austurvegi á Selfossi. 

Fylgst var með bílnum og ekki leið á löngu að snjóboltar flugu út um hliðarrúður bifreiðarinnar.  Segir lögreglan á Selfossi, að greinilegt hafi verið, að ökumaðurinn var að kasta boltunum í bíla, sem urðu á leið hans. 

Bílnum var veitt eftirför þar sem henni var ekið greitt inn á Bankaveg þar sem börn voru að leik í snjóruðningum við götuna.  Þar er skóli og Sundlaug Selfoss.  Þegar loksins tókst að stöðva ökumann bifreiðarinnar kom í ljós að hann og farþegi hans höfðu hnoðað marga snjóbolta og voru nokkrir þeirra í gólfinu hjá ökumanni. 

Lögreglan segir, að þarna hafi fengist skýring á sveiflukenndum akstri ökumanns rétt áður en hann átti til að missa tök á akstrinum þegar hann var að teygja sig eftir snjóboltum. 

Ökumaðurinn var færður í lögreglustöð þar sem hann var yfirheyrður.  Hann verður kærður fyrir umferðarlagabrot.     

• 1 blogg um fréttina

Bloggað um fréttina

• Sigurður Haraldsson: Flott hjá lögguni.