Innlent | mbl | 29.3.2011 | 17:13 | Uppfært 18:05

Höfuðstöðvar hugsanlega seldar

Leitun er að borgarfyrirtæki sem á jafn glæsilegar og dýrar höfuðstöðvar. mbl.is/Þorvaldur Örn Kristmundsson

Meðal ráðstafana til að koma í veg fyrir sjóðþurrð Orkuveitu Reykjavíkur er sala eigna utan kjarnastarfsemi. Meðal annars á að kanna fýsileika þess að selja höfuðstöðvar Orkuveitunnar við Bæjarháls í Reykjavík. Einnig verður Perlan boðin til sölu. Þetta kom fram á blaðamannafundi í dag.

Gert er ráð fyrir að sala eigna utan kjarnastarfsemi skili 10 milljörðum króna. Hótel Hengill hefur þegar verið boðinn til sölu.

Perlan var raunar boðin til sölu á árinu 2001, skv. tillögu Alfreðs Þorsteinssonar borgarfulltrúa Framsóknarflokksins og fyrrv. stjórnarformanns Orkuveitunnar.

Í gögnum sem birt eru á vef Reykjavíkur kemur fram að ef höfuðstöðvarnar verða seldar verði samið um að húsið verði leigt til OR til langs tíma.

Einnig á að kanna möguleikann á því að Gagnaveitan, sem skilgreind hefur verið sem hluti af kjarnastarfsemi Orkuveitunnar, „verði grunnur að sameiginlegu grunnneti landsins í gagnaflutningum, sem tryggi hagstætt verð, opna samkeppni og meirihlutaeign almennings.“