Innlent | mbl | 30.3.2011 | 18:48

Höfðu yfirlýsingarnar áhrif?

Orkuveituhúsið. Það er til sölu. mbl.is/Ómar Óskarsson

Guðlaugur Gylfi Sverrisson, fyrrum stjórnarformaður Orkuveitu Reykjavíkur, segir að fram að því að hann lét af störfum í júní 2010 hafi lánadrottnar sýnt skilning og Norræni fjárfestingabankinn hafi lýst því yfir að mikill vilji væri til að lána OR. Hann spyr um áhrif fullyrðinga stjórnenda og fulltrúa eigenda um gjaldþrot OR.

„Getur verið að yfirlýsingar stjórnenda og eigenda um stöðu og greiðslugetu OR hafi haft áhrif til hins verra við útvegun fjármagns til rekstrar OR? Fullyrðingar nýrra stjórnenda OR um gjaldþrot fyrirtækisins er algjörlega á þeirra ábyrgð,“ spyr Guðlaugur Gylfi í yfirlýsingu.

Stjórnarformaður í tvo mánuði þegar bankar hrundu

Guðlaugur Gylfi tók við sem stjórnarformaður OR í ágúst 2008 en lét af störfum í júní 2010, eftir að meirihluti Besta flokksins og Samfylkingarinnar tók við völdum.

Í yfirlýsingu frá honum í dag bendir hann á að hann hafði verið stjórnarformaður í tæpa tvo mánuði þegar bankakerfið hrundi og skuldirnar tvöfölduðust, svo að segja yfir nótt. Þegar hafi verið hafin vinna við að bregðast við gjörbreyttum aðstæðum á markaði. Rekstrarkostnaður hafi verið lækkaður um milljarð, starfsfólk tók á sig 10-30% launalækkanir, ráðningarbann var sett á og fleira.

Samkvæmt áhættumati á rekstri OR á árinu 2009 hafi OR þurft að eiga fyrir tveimur stórum gjalddögum, annars vegar á árinu 2011 og hins vegar á árinu 2013. Til að gæta fyllstu varúðar hafi þáverandi borgarstjórn ákveðið að taka frá 10-12 milljarða af handbæru fé Reykjavíkurborgar til að geta greitt þessa gjalddaga ef illa færi og ekki tækist að endurfjármagna þessi lán.

Síðan segir í yfirlýsingunni:

„Allan þann tíma sem ég starfaði sem stjórnarformaður áttu stjórnendur OR í góðu samstarfi við lánardrottna sem byggt var á trausti en þeir sýndu félaginu skilning á erfiðum tímum. Á árinu 2009 fékk OR lán afgreitt frá Evrópska þróunarbankanum (CEB) upp á 6-7 milljarða. Í nóvember sama ár fékkst lán frá Evrópska fjárfestingabankanum (EIB) upp á 30 milljarða. Í janúar 2010 fóru fjármálastjóri Reykjavíkur og fjármálstjóra OR til fundar við Norræna fjárfestingarbankann (NIB). Þar var lýst yfir að mikill vilji væri til að lána OR um 12-14 milljarða. NIB setti þó fram þau skilyrði að hækkunarþörf á gjaldskrá OR yrði staðfest í þriggja ára áætlun félagsins . Seld voru skuldabréf á markaði fyrir um 5 milljarða á árinu 2010. Í júní 2010 er undirritaður lætur af stöfum sem stjórnarformaður OR voru engin vandkvæði á því að NIB muni lána fyrrgreinda upphæð til landsins að skilyrðum uppfylltum.“

Hvað breyttist eftir júní 2010?

Guðlaugur Gylfi segir að OR hafi fengið lán allan þann tíma sem hann var forstjóri.

„Hvað breyttist eftir júní 2010? Núverandi forstjóri hefur staðfest án frekari skýringa að skyndilega um áramótin 2011 hafi viðhorf til félagsins gjörbreyst. Höfðu þá nýir stjórnendur setið að félaginu í hálft ár, skipt um forstjóra, sett bráðabirgðaforstjóra og hækkað gjaldskrá á almenning.

Getur verið að yfirlýsingar stjórnenda og eigenda um stöðu og greiðslugetu OR hafi haft áhrif til hins verra við útvegun fjármagns til rekstrar OR? Fullyrðingar nýrra stjórnenda OR um gjaldþrot fyrirtækisins er algjörlega á þeirra ábyrgð,“ spyr Guðlaugur Sverrir.

Staða fyrirtækisins skipti mestu

Bjarni Bjarnason, forstjóri OR, hafnaði því í samtali við Morgunblaðið gær að ummæli manna um fjárhagsstöðu Reykjavíkur hefðu ráðið einhverju um þá ákvörðun erlendra lánardrottna að endurfjármagna ekki fyrirtækið. Mestu hefðu skipt kennitölur í rekstri, horfur og fjárhagsleg staða OR.