Innlent | mbl | 2.4.2011 | 12:38 | Uppfært 13:15

Skrautreið á Laugaveginum

Götur miðbæjarins tóku á sig nýja en þó gamalkunna mynd þegar skrautreiðin fór þar um. Var stemmningin eins og á sunnudegi á fyrrihluta síðustu aldar. mbl.is/Kristinn

Laugavegurinn var frátekinn fyrir umferð þarfasta þjónsins um tíma í dag. Fjöldi hestamanna var í skrautreið sem er liður í Hestadögum og þar var þjóðleg stemmning af því tilefni.

Skrautreiðin hófst við Umferðarmiðstöðina. Farið var um Lækjargötu og upp Bankastræti og Laugaveg.

Góð stemmning var á Laugaveginum og fólk beið á gangstéttum til að fylgjast með. „Langur laugardagur“ er í miðbænum og margt um að vera.

Skrautreiðin hélt áfram og áfangastaðurinn er Fjölskyldu- og húsdýragarðurinn. Þar verður fjölskylduhátíðin „Gobbidí gobb“ frá klukkan 13 til 16. Þar eru hestar teymdir, markaðstorg, sögusýning og ýmislegt fleira.

Hestadögum lýkur síðan með ístöltsýningu í Skautahöllinni í Laugardal í kvöld. Þar mæta til leiks allra bestu hestar og knapar landsins.