Friða verkamannabústaðina

Katrín Jakobsdóttir, mennta- og menningarmálaráðherra, hefur friðað verkamannabústaðina við Hringbraut og mannvirki á Héðinsvelli við Hringbraut að tillögu Húsafriðunarnefndar.

Verkamannabústaðirnir við Hringbraut voru byggðir í þremur áföngum á árunum 1931-1937. Markmiðið með byggingu þeirra var að tryggja almenningi aðgang að vönduðum húsakosti og heilsusamlegu umhverfi. Fyrstu bústaðirnir voru reistir í tveimur áföngum vestan Hofsvallagötu, eftir teikningum Guðjóns Samúelssonar húsameistara ríkisins, og mynda þeir samfellda húsaröð kringum stórt sameiginlegt port. Nokkrum árum síðar voru byggðar nokkrar húsalengjur til viðbótar austan Hofsvallagötu, eftir teikingum Gunnlaugs Halldórssonar arkitekts.

Í tilkynningu húsafriðunarnefndar kemur fram að umræddar byggingar séu einstakar í íslenskri byggingarsögu. Þar birtust nýjungar í skipulagi bæði hins ytra og innra umhverfis og hönnun sem markaði straumhvörf í íslenskri byggingarlist. Friðunin nær til allra þriggja áfanganna og tekur til garðveggja og ytra byrðis húsanna.

• 2 blogg um fréttina

Bloggað um fréttina

• Ómar Ragnarsson: Líka þríhyrninginn á Rauðarárholti.
• Ómar Sigurðsson: Ekki spyr ég nú að