Innlent | mbl | 9.4.2011 | 17:37 | Uppfært 18:22

Talsvert meiri kjörsókn nú

Talsvert fleiri höfðu kosið klukkan 17.00 í dag en á sama tíma í fyrri Icesavekosningunni 2010.

Kjörsókn á höfuðborgarsvæðinu var orðin talsvert meiri klukkan 17.00 í dag en á sömu stundu í fyrri þjóðaratkvæðagreiðslunni um Icesave árið 2010.

Kjörsókn í Suðvesturkjördæmi kl. 17:00 var orðin 44,2%. Þá höfðu 26.800 manns kosið í kjördæminu. Í þjóðaratkvæðagreiðslunni 2010 höfðu 24.725 kosið á sama tíma eða 41,7%. Í Alþingiskosningum 2009 höfðu 30.029 kosið eða 51,6%.

Í Reykjavíkurkjördæmi norður hafði 18.001 kosið klukkan 17.00 eða 40,43%. Í þjóðaratkvæðagreiðslunni um Icesave 2010 höfðu 15.818 kosið á sama tíma eða 35,96%. Í alþingiskosningunum 2009 höfðu 21.881 kosið klukkan 17.00 eða 49,99%

Í Reykjavíkurkjördæmi suður höfðu 19.324 kosið klukkan 17.00 eða 43,46%. Í Icesave kosningunni 2010 höfðu 17.323 kosið klukkan 17.00 eða 39,33%. Í Alþingiskosningunum 2009 höfðu 22.850 kosið eða 52,23%.

Á Akureyri höfðu 5601 kosið klukkan 17:00 síðdegis, eða tæp 43%. Það er meira en á sama tíma í fyrri þjóðaratkvæðagreiðslunni um Icesave, sem þá var 39,9%. Hins vegar höfðu fleiri kosið á sama tíma í síðustu alþingiskosningum eða um 47,6%.

Í Norðurþingi hafa 46,92% kosið af þeim sem eru á kjörskrá. Flestar kjördeildir Norðurþings loka klukkan 18 nema í Húsavík.

Kjörsókn hefur dvínað nokkuð í Suðurkjördæmi það sem af er degi, eftir kröftuga byrjun. Klukkan 17 höfðu 15.024 kosið eða 45,59% af þeim sem eru á kjörskrá.

Klukkan 18 í kvöld höfðu 11.394 kosið í Norðvesturkjördæmi eða um 53,46%.