Enn allt á huldu í Karphúsinu

Aðilar vinnumarkaðarins hafa fundað í Karphúsinu með fulltrúum stjórnvalda um gerð nýrra kjarasamninga í allan dag. „Það er allt á huldu um það hvort samningar nást,“ segir Vilmundur Jósefsson, formaður Samtaka atvinnulífsins, í samtali við mbl.is. 

Aðspurður segir Vilmundur að framkvæmdapakkinn sé enn í lausu lofti, en samgöngupakkinn svokallaði sé „algjörlega nauðsynlegur til þess að við sjáum fram á eitthvað - þó ekki nema bara fyrir byggingariðnaðinn og jarðvinnuverktaka.“

Vilmundur segir að menn séu einnig að takast á um atvinnutryggingargjaldið og sjávarútvegsmálin. „Þannig að það stendur ennþá mikið út af borðinu. Við þurfum að fá frekara útspil.“

Fundað með forsætis- og fjármálaráðherra

SA fundaði með Jóhönnu Sigurðardóttur forsætisráðherra og Steingrími J. Sigfússyni fjármálaráðherra í Stjórnarráðinu fyrir hádegi í dag. „Það kom afskaplega lítið fram. En það er alltaf hreint góð byrjun þegar fólk er farið að viðurkenna að það sé nauðsynlegt að taka á vandanum,“ segir Vilmundur.

Aðspurður segir hann að Jóhanna hafi sagst ætla að ræða við bakland sitt og skoða málin frekar. Það sé hins vegar ljóst að útspil stjórnvalda verði að koma sem fyrst því.

„Ef það kemur ekki neitt sem er ásættanlegt þá förum við bara í skammtímasamning.“ Menn muni hins vegar reyna til þrautar að ná samningi til þriggja ára.

Fulltrúar ASÍ áttu fund með fjármálaráðherra eftir hádegi, en skv. heimildum mbl.is var sá fundur árangursríkur.  

Ákvörðun mun liggja fyrir á morgun

„Á morgun er dagurinn sem verður tekin ákvörðun um það hvor leiðin verður farin. Við, að sjálfssögðu, veljum frekar að fara skynsamlegu leiðina og fara þessa atvinnuleið.“

Vilmundur segir að sú vinna sem hafi farið fram í dag miðist við gerð kjarasamninga til næstu þriggja ára. Staðan sé hins vegar óljós og beðið sé eftir útspili frá ríkisstjórninni.

• 1 blogg um fréttina

Bloggað um fréttina

• Haraldur Haraldsson: Enn allt á huldu í Karphúsinu/Er það ekki á Jóhönnu …