Lögregluembættum fækki

Innanríkisráðherra hefur lagt fram lagafrumvarp á Alþingi sem gerir ráð fyrir því að lögregluembættum verði fækkað úr 15 í 8.

Fjármálaráðuneytið segir að ný og stærri embætti geti betur sinnt lögbundnum skyldum sínum og náð þeirri hagræðingarkröfu sem gerð hafi verið til þeirra á undanförnum árum.

Samkvæmt frumvarpinu fara eftirfarandi lögreglustjórar með lögreglustjórn:

    1.      Lögreglustjórinn á höfuðborgarsvæðinu
    2.      Lögreglustjórinn á Suðurnesjum
    3.      Lögreglustjórinn á Vesturlandi
    4.      Lögreglustjórinn á Vestfjörðum
    5.      Lögreglustjórinn á Norðurlandi vestra
    6.      Lögreglustjórinn á Norðurlandi eystra
    7.      Lögreglustjórinn á Austurlandi
    8.      Lögreglustjórinn á Suðurlandi 

Ekki er gert ráð fyrir að mörk lögregluumdæmanna verði lögbundin heldur verði þau ákvörðuð í reglugerð að höfðu samráði við Samband íslenskra sveitarfélaga. Þetta sé gert þar sem fjöldi sveitarfélaga hafi verið að taka breytingum og megi búast við að svo verði áfram.

Í frumvarpi til lögreglulaga, sem var lagt fram á Alþingi vorið 2010, var lagt til að lögregluembættum fækki í 6.  

Í athugasemdum með nýja frumvarpinu segir, að dregið hafi verið úr þeirri áherslu sem var á að færa verkefni frá ríkislögreglustjóra til einstakra lögreglustjóra. Í tillögunni nú felist, að fallið hafi verið frá því að sameina alla lögregluna á Íslandi í eina stofnun en markmiðið sé þó að lögreglan vinni í auknum mæli saman sem ein heild.

Gert er ráð fyrir að ný sameinuð embætti taki til starfa 1. janúar 2012.

Frumvarpið í heild

• 1 blogg um fréttina

Bloggað um fréttina

• Ólafur Ragnarsson: "ekki löglegt "