Alþingi hefur sett niður

Ólína Þorvarðardóttir, þingmaður Samfylkingarinnar, sagði í umræðum um störf þingsins á Alþingi í dag, að ekki gæti gengið til lengdar, að öll mál verði að ágreiningi innan þings sem utan þegar menn stæðu í þeim sporum, sem íslensk þjóð er í um þessar mundir.

Sagðist Ólína vekja máls á þessu í kjölfar umræðunnar sem fór fram á miðvikudag um vantrauststillögu sjálfstæðismanna. 

„Ég lít svo á, að Alþingi Íslendinga hafi sett niður og þar er engum um að kenna nema þinginu sjálfu," sagði Ólína.

Hún minnti á að í rannsóknarskýrslu Alþingis hefði verið sett alvarlega ofan í við íslenska stjórnmálaumræðu og fulltrúar allra flokka hefðu tekið undir meginniðurstöður skýrslunnar. 

Þar hafi verið lögð áhersla á aukna fagmennsku við undirbúning löggjafar og bætta umræðusiði á Alþingi.

„Alþingi hefur veigamiklu hlutverki að gegna, ekki aðeins sem löggjafarvald, fjárveitingarvald og sem eftirlitsaðili. Það hefur forustuhlutverki að gegna í opinberri umræðu. Og mig langar til að biðja alla þingmenn til að líta nú í eigin barm og svara þeirri samviskuspurningu hver fyrir hvort Alþingi hafi yfirleitt verið að rækja þetta hlutverk sitt upp á síðkastið," sagði Ólína. 

• 6 blogg um fréttina

Bloggað um fréttina

• Óðinn Þórisson: Ólína setur alþingi niður
• Ólafur Ragnarsson: " hitna í kolunum"
• Páll Vilhjálmsson: Ólína, ólögmætt stjórnlagaráð og virðing alþingis
• Eiður Ragnarsson: Mikið er....
• Kristinn Karl Brynjarsson: Upplýsandi umræður í þinginu.
• Gunnar Heiðarsson: Að kasta steini í glerhúsi