Líst illa á samningstilboð

Vilhjálmur Egilsson, framkvæmdastjóri Samtaka atvinnulífsins, á ekki von á að vel verði tekið í tilboð Starfsgreinasambandsins um kjarasamning til eins árs.

Hljóðar tilboðið upp á samning til eins árs með 15.000 króna taxtahækkun frá 1. mars og almenna kauphækkun upp á 4,5% svo og hækkun lágmarkstekjutryggingar í 200.000 krónur. 

„Við viljum bara reyna að komast  inn á atvinnuleiðina. Þessi samningur hefði ekki í för með sér að fjárfestingar kæmust af stað eða minnka atvinnuleysi og skapa störf,“ segir Vilhjálmur.

Tilboðinu verði væntanlega svarað þegar fundir hefjist að nýju eftir páska en hann eigi ekki von á að vel verði tekið í það.

Brýnt að ná sáttum 

Á vef Starfsgreinasambandsins segir núna meðal annars í kvöld:

„Eins og kunnugt er tók Starfsgreinasambandið virkan þátt í samningaviðræðum ASÍ við Samtök atvinnulífsins sem slitnaði upp úr á föstudagskvöld. Flest sérmál Starfsgreinasambandsins voru þá í höfn en þó var enn ósamið um nýja nálgun í ákvæðistengdri ræstingarvinnu og um kjör ræstingarfólks auk þess sem áherslur um málefni fiskvinnslunnar voru ókláruð. Brýnt er að ná sátt í þessum málum strax næstu daga, en það er m.a. forsenda fyrir því að unnt verði að klára kjarasamning milli Samtaka atvinnulífsins og Starfsgreinasambandsins.

Þótt viðræður ASÍ og Samtaka atvinnulífsins hafi farið út um þúfur um skeið, ber okkur engu að síður skylda til að reyna samninga til þrautar. Deilu Starfsgreinasambandsins við Samtök atvinnulífsins var vísað á borð ríkissáttasemjara í janúar, en þær viðræður hafa þó enn ekki verið sagðar áranguslausar."

• 2 blogg um fréttina

Bloggað um fréttina

• Jakobína Ingunn Ólafsdóttir: Færir ekki fórnir, nei, nei.
• Gunnar Heiðarsson: Að hrökkva eða stökkva