Fyrirtæki „myndu hrynja“

„Um 40% launafólks á almennum markaði vinna í verslun og ferðaþjónustu. Sum fyrirtækin í þessum greinum myndu ekki lifa allsherjarverkfall af. Ég segi það hreint út. Fyrirtæki myndu hrynja hvert af öðru.“

Þetta segir Andrés Magnússon, framkvæmdastjóri Samtaka verslunar og þjónustu, í Morgunblaðinu í dag um áhrif allsherjarverkfalls við upphaf ferðasumars. Rætt er við hann um stöðu verslunar.

Andrés dregur upp dökka mynd og segir „stórhættu“ á að lífskjör sigli í þá átt að verða sambærileg við það sem gerist í Austur-Evrópu.

Kaupmenn greini merkjanlega breytingu á neyslumynstrinu frá hruni. Þróunin sé í átt til lágverðsverslana með minna úrvali.

Margrét Kristmannsdóttir, formaður SVÞ, reiknar með að eigendur verslana sem standa höllum fæti „neyðist til þess að loka“ og komast þannig hjá tapi.