Meiðyrði á báða bóga

Héraðsdómur Suðurlands hefur dæmt konu til að greiða Eggert Haukdal, fyrrverandi alþingismanni, og sambýliskonu hans,  300 þúsund krónur hvoru í bætur fyrir meiðyrði. Eggert er jafnframt dæmdur til að greiða konunni og eiginmanni hennar 300 þúsund krónur hvoru í bætur fyrir meiðyrði.

Þá eru tiltekin ummæli, sem Benedikta Haukdal viðhafði á bloggvef um Eggert og sambýliskonu hans á árinu 2008 dæmd dauð og ómerk. Einnig eru tiltekin ummæli, sem Eggert viðhafði um Benediktu og eiginmann hennar í bréfum árið 2007 dæmd dauð og ómerk.

Málið tengist langvinnum deilumálum, sem ítrekað hafa komið til kasta dómstóla en þau hófust eftir að Eggert seldi Benediktu og manni hennar jörðina Bergþórshvol 2 með þeirri kvöð að hann hefði til lífstíðar búseturétt í íbúðarhúsinu á jörðinni.

Ummælin sem Eggert kærði birtust á bloggsíðu á vefnum MySpace. Héraðsdómur féllst á að ummæli þar sem m.a. er talað um dauðalista og eitursprautur skyldu dauð og ómerk. Önnur ummæli, þar sem m.a. var talað um karlskrögg, ómaga og „hnýsnu Guddu" voru talin innan marka tjáningarfrelsis.

Þá voru ummæli, sem Eggert viðhafði í bréfi um að Benedikta og maður hennar hefðu eignað sér búpening á smánarverði og nýtt sér slæma heilsu Eggerts dæmd dauð og ómerk. Einnig ummæli um í lesendabréfi í DV þar sem Eggert sakaði Benediktu og mann hennar um sauðaþjófnað.

• 1 blogg um fréttina

Bloggað um fréttina

• Torfi Kristján Stefánsson: Ætli þau séu skyld?