Innlent | mbl | 10.5.2011 | 17:51

Áhyggjur af aukinni neyslu kannabis

Ungur maður reykir maríjúana. AP

Samfélags- og mannréttindaráð Akureyrar lýsir yfir áhyggjum aukinni neyslu ungmenna í bænum á kannabisefnum. Þetta kom fram á síðasta fundi ráðsins og einnig að áfram verði unnið að málinu.

Bæjarráð Akureyrar fékk á fund við sig nýverið aðstoðarskólameistara Verkmenntaskólans á Akureyri og Menntaskólans á Akureyri, húsbónda heimavistar VMA og MA, og forvarnarfulltrúa beggja skóla til að ræða um aukna neyslu ungmenna á Akureyri á kannabisefnum.

Umræðan hefur verið hávær að undanförnu innan sveitarfélaga hér á landi, samhliða fræðslufundaröð sem fer fram um land allt undir yfirskriftinni Bara Gras?

Á fundi samfélags- og mannréttindaráðs Akureyrar kom einmitt fram að ráðið muni taka þátt í fundaráði með málþingi í lok mánaðarins. Er það ætlað foreldrum og markmiðið að fræða þá um skaðsemi kannabis auk þess að hjálpa þeim að leita sér upplýsinga.

Nýverið var haldinn fræðslufundur í Hafnarfirði þar sem kannabismálin voru til umræðu. Í máli forvarnafulltrúa bæjarins kom fram að hlutfall nemenda í 10. bekk sem notað hafa hass eða maríjúana þrisvar sinnum eða oftar hefur farið lækkandi undanfarin ár en virðist sem það sé aftur á uppleið, alla vega miðað við tölur fyrir síðasta ár.

Þá kom fram að ungmenni án atvinnu voru mun líklegri til þess að neyta kannabisefna en þau sem voru í námi eða vinnu.

Af málþinginu að ráða er ljóst að sannarlega hafi orðið aukning á neyslu maríjúana hjá ungu fólki. Spurningin er hins vegar hvernig bregðast skuli við og sporna við neyslunni.