Þyrla í ísbjarnaleit

Þyrla Landhelgisgæslunnar TF-GNÁ hefur flogið um Hornstrandir og Jökulfirði í dag við hvítabjarnaeftirlit.

Hrafnhildur Brynja Stefánsdóttir, upplýsingafulltrúi Landhelgisgæslunnar, segir eftirlitið að frumkvæði lögreglunnar annars vegar og Umhverfisstofnunar hins vegar, sem fer með málefni hvítabjarna hér á landi.

Auk starfsmanna Gæslunnar er Jón Björnsson landvörður Hornstrandafriðlandsins með í för. Eftirlitið hófst í morgun og er áætlað að því ljúki seinni partinn í dag. Aðspurð kvaðst Hrafnhildur ekki vita um hvort menn hefðu orðið varir við hvítabirni eða ummerki um þá en greint yrði betur frá leiðangrinum síðar í dag.

Auk bjarnaeftirlitsins segir Hrafnhildur að flugvél Gæslunnar sé nú í hafísflugi milli Vestfjarða og Grænlands. „Það má því segja að Vestfirðir séu helsta athafnasvæði Landhelgisgæslunnar í dag.“

bb.is

• 1 blogg um fréttina

Bloggað um fréttina

• Haraldur Haraldsson: Þyrla í ísbjarnaleit/var ekki verið að spara hjá gæslunni???/flugtimin kostar …