11 teknir ölvaðir undir stýri

Lögreglan á höfuðborgarsvæðinu stöðvaði 11 ökumenn í nótt sem óku undir áhrifum áfengis. Fremur rólegt var á vaktinni fram til kl. fjögur í nótt en eitthvað var um minniháttar pústra fyrir utan skemmtistaði í miðborginni nú í morgun.

Varðstjóri segir að almennt hafi menn verið nokkuð spakir í miðbænum. Ástandið sé þveröfugt miðað við það sem var í fyrrinótt.

Einn gistir fangageymslur.

Lögreglan segir að ástand ökumannanna sem hún stöðvaði í nótt hafi verið misjafnlega slæmt. Einn ökumaður hafi t.a.m. verið það drukkinn að hann sofnaði þegar verið var að taka úr honum blóð.

Þá var einn af þeim tekinn á 106 km hraða á Hringbraut um miðnættið, en þar er hámarkshraði 60 km á klst. Hann var sviptur ökuréttindum til bráðabirgða.

Flestir ökumannanna sem voru stöðvaðir eru á milli 30 og fertugs og er meirhlutinn karlmenn.

Þá sinnti lögreglan fjórum útköllum í nótt vegna hávaða.

• 1 blogg um fréttina

Bloggað um fréttina

• Haraldur Haraldsson: 11 teknir ölvaðir undir stýri/þetta gott lögæslan á að vera …